Novoslověnsky jezyk bude v filmu "Barvovana Ptica"

Znajemy češsky producer, akter i režiser Václav Marhoul bude gotoviti film na osnově knigy "Barvovana Ptica" (orig. Painted Bird, barva = cvět, šara, boja) od američskego autora Jerzy Kosińskiego. Kniga opisivaje težky život jevrejskego dětka, ktorego jego roditeli sut ukryli na selo v vremeni 2-ej světovej vojny.

Ljudi v tutom istoričnem filmu budut govoriti svojimi narodnimi jezykami. To znači, že napriměr vojniki Wehrmachta budut govoriti němecskim jezykom, vojniki Sovětskej Armije budut govoriti russkim jezykom itd. No městni ljudi iz sela budut govoriti novoslověnski. Pričina koristěnija medžujezyka jest v tom, že autor knihy ne napisal točnu lokalitu i narod svojih osob v knigě i film hoče tuto autorovu ideju respektiranija tajnosti točnej lokality i naroda d'ržati. Zatože film bude zvukovo mnogojezyčny, bude jemu trěba iměti textove podtitulky p'rvoplanovo v englijskem, češskem, russkem i novoslověnskem jezykah. 

Tutoj buduči film je dostal nominaciju do 12 najlučših scenarov sredno i vazhodnoeuropskih filmov v programě ScripTeast do filmovego festivala 2013 v Cannes.

Gospod Václav Marhoul jest znajemim akterom, režiserom i produčnim manažerom mnogih filmov. Je byl direktorom českoslovackih filmovih atelierov Barrandov i jest kromě drugego velikim expertom na realistične istoricke filmy. Jego posledny čin jest medžunarodno popularny film "Tobruk" o českoslovackih vojnikah v severnej Afrikě. 

otkazy

Kniga: http://en.wikipedia.org/wiki/The_Painted_Bird
Budučy film "Barvovana Ptica":http://www.filmneweurope.com/news/czech/102636-production-the-painted-bird-in-development/menu-id-150, http://www.comingsoon.net/films.php?id=66735
Nominacija scenara do Cannes: http://www.scripteast.pl/35,5,2012.html
Uspěšny film "Tobruk": http://www.ceskatelevize.cz/specialy/tobruk/
Václav Marhoul, jego projekty: http://www.imdb.com/name/nm0546905/